الطريق السريع للموت(الادمان)

اول شئ تعمله لو حسيت انك في طريق الادمان او حسيت ان حد من اهلك في طريقة للادمان

طبعا صعب على اي حد في بداية طريقه انه يعترف بالفعل انه مدمن او حتى لسه في البدايات

كمان رد فعل الاصدقاء و الاهل بيكون صعب شويا في البدايه.

المدمن الجديد لو كشفته هايوعدك بانه خلاص هايبطل و ممكن تكون دي رغبته بالفعل بس للاسف موش هايقدر لوحده ان الاقلاع عن الادمان موش سهل و ناس كتير بتتصور انه ممكن تقلع عنه لوحدها بدون مساعدة الغير و ده غلط

افضل شئ تعمله في الحاله دي لو كنت مدمن .. انك تفكر كويس في انسان من اهلك يكون ثقه

اخوك ابوك عمك صديقك حتى .. المهم يكون مخلص لك و بيحبك بدون شئ و تهمه مصلحتك

و طبعا لازم يكون بالغ .. يعني ما ينفعش تيجي تقولي انا قلت لاخويا اللي عنده 10 سنين

لأ طبعا لازم يكون بالغ و ناضج و واعي بالدرجة اللي ممكن يقدر بيها يقدملك الدعم و التشجيع

اللي انت محتاجه عشان تقلع عن الادمان و يبدأ معاك رحله العلاج و تروحوا سوا لمراكز علاج

الادمان.



و هاننشر عناوينها و ارقامها قريبا ان شاء الله.

ممكن حد ييجي يقول طيب لزمته ايه افضح نفسي ما اروح لوحدي مركز علاج ادمان و اتعالج و ابقى سليم و لا من شاف و لا من دري.

رد الخبراء على هذا السؤال انه 90 % من الشفاء مرتبط باحساس المدمن لحظة ضعفه و احتياجه للمخدر اللعين انه فيه حد مهتم بيه و خايف عليه . و ده موش هاييجي من الدكاترة و لا من طاقم المركز.

ده موش هاييجي الا من شخص يهمه امر المدمن و يخاف عليه فعلا زي اهله او اصدقائه المخلصين.

و ان شاء الله بالتعافي و الشفاء و أتمنى انه كل شخص حاسس انه في طريقه للادمان

ان يبدأ العلاج و احنا معاه هانقدمله كل الدعم المعنوي و هانقف وراه لحد ما يقلع تماما

و ينجو من انه يكون ده مصيره