النهارده اجمل من بكره

أما أنا يا ابني شفت لك امبارح حتة حلم
أغرب من أغرب فيلم
شُفت لك الديك بطاقية حمرا و جلابية
واقف بيكلّم شمس الصبحية
يا شموسة يا ام ضفاير دهبية
دهبِك فالصو.. قُصّيه و ارميه

الشمس انكسفت خالص
بقى لونها أصفر خالص
زي لمونة من الدهب الخالص
و انعصرت خالص
و قالت له بصوتها الدهبي
تقصد إيه؟

قال لها
لو سبتي السما و نرلتي السوق
الناس حيبصوا لك من تحت لفوق
و يقولوا
و دي تنفعنا بإيه؟

لو كنتي جنيه
كنت اشتري بيكي مصاصة و بالون اتنطط بيه
لو كنتي جنيه أو حتى قرش نحاس
مش كنتي بقيتي مفيدة لكل الناس؟

فكرّت الشمس الدهبية شوية
و قالت للديك
إنت ولا فاهم حاجة يا ديك
و عامل لي فكيك
ده لولايا عليك
ما كنت طلعت من البيضة
و لا كنت اتعلّمت الغنا و المزازيك

و لولايا على الناس و الدنيا
ما كانتش الأيام البيضا تصبح بيضا
ولا كانت أرض الناس تولد فاكهة
و سنابل و فاصوليا
و لا ورد ندوّبه في كلونيا

الديك المتكلّم .. بلّم
و جري يا فكيك من غير ما يحيّي و لا يسلّم
و صحيت و انا باصرخ و اتكلّم
خدوا كل فلوسي .. ورق و دهب و نحاس
و سيبوا لي الشمس يا ناس
سيبوا لي الشمس يا ناس
سيبوا لي الشمس يا ناس

من ورا ستارة الليالي
شمس بكرة جايّة تاني
إحنا شايفينِك تعالي
يا ام ضحكة برتقاني

العروسة الدهبية
جايّة و ف شفايفها وردة
شمس بكرة جايّة جايّة
بكرة أجمل م النهارده

شُفت يوم عصفورة نونو
لسه طالعة من أودتها
ريشها كان مبلول و لونه
لون غناها و صوصوتها

قمت قُلت ف عقل بالي
بقى دي جناحها يشيلها؟
سِبتها و مشيت في حالي
بعد مدة قلت آجي لها

قال لي واحد من جيرانها
ياه دي طارت ليها مدة
قلت معنى طيرانها
بكرة أجمل م النهارده

شُفت مرة مهرة سمرا
نونو ماسكة ف ديل مامتها
قُلت بكرة حتبقى حرة
تجري وحديها براحتها

عدى شهر و شهر تاني
شُفتها فرسة جميلة
تنطلق تجري ف ثواني
تقطع الرحلة الطويلة

قمت قلت لها قولي لي
ليه بتجري يا مهرة شاردة
قالت الريح بتنادي لي
بكرة أجمل م النهارده

من ورا ستارة الليالي
شمس بكرة جايّة تاني
إحنا شايفينِك تعالي
يا ام ضحكة برتقاني

العروسة الدهبية
جايّة و ف شفايفها وردة
شمس بكرة جايّة جايّة
بكرة أجمل م النهارده