غمض عنيك ثواني
قوللي شايف ايه؟؟
سواااااد؟؟
ليه كدة بس ؟؟ طب ماتلونها أبيض
ارسم فيها ناس كتيرة
وسعلك مكان في الزحمة
اقف وسط الناس اللي انتا رسمتهم
زهقت من الزحمة ؟؟
أطلع فوق طير وطير بيه
لأ أقولك ؟.... طير لوحدك مانتا في حلم
أطلع فوق فوق فوق.......هاه؟
أخرك فين ؟؟
مالكش أخر ؟؟
شايف أيه ؟؟
شواد برضه ؟؟ انتا ماحرمتش؟؟
طيب أرسم نحوم وحطها
سمّي كل واحدة وافتكر اسمها
مالك فيه ايه ؟؟
وحشتك الزحمة ؟؟
مش هتقدر تجعلها
مانتا مسحتها
وهربت وجريت منها
سيبك من الزحمة ... واحلم
تحلم بأيه ؟؟ ياااه سؤال صعب
انتا بين النجوم دلوقتي
ومش عارف تحلم بأيه؟؟
أحلم انك أقوى واحد
اسرع واحد
اذكى واحد
اجمد واحد
ماهو مفيش غيرك واحد
احسن واحد في كل حاجة
مستغرب ليه المسألة مش محتاجة
افتكرت ربك ؟؟
هتلاقي نفسك ضعيف
صغير .. تعبان خفيف زي الطيف
زعلان عشان ممعاكش حاجة ؟؟
طيب أدعيله عشان يديك أي حاجة
بتحبه ؟؟... خايف منه؟؟
طيب ماتزعلوش
عكننت عليك... هاه ؟؟
انا اسف
طيب كمل حلمك
لسة الزحمة واحشاك؟؟
بتحبها؟؟
ارسمها وانزلها
نزلت ياعم؟؟
انا مش فاهم يعني النجوم مش عاجباك
والزحمة اللي عاجباك؟؟
اه بتحب الزحمة عشان بتحب حاجات موجودة فيها
بتبص فين؟؟
حبيبتك واحشاك
روحلها ماهى واقفة هناك
متقولش ؟؟؟!!! مش عارفاك؟؟
طيب ماتقولها
باللي في قلبك وبوحلها
خايف منها؟؟
خايف عليها من كلام الناس؟؟
طب سيبك من الكلام ده وبطل الوسواس
واوعى تستهتر وتلعب ببنات الناس
ولو غرضك شريف روح قوللها وخلاص
ولو بتحبك وطلعت بنت ناس
هتساعدك وتبقى معاك مع كل خطوة بتنداس
خلاص ؟؟؟
طب فتح عنيك دلوقتي وقوللي شايف أيه ؟؟
واقع مش قادر عليه ؟؟
طب عيش في الحقيقة
وخليك فاكر حلمك
وادعى ربك انك تعرف تحلم تانى
موضوع: احلم....عيش...عيش حياتك 
الثلاثاء سبتمبر 02, 2008 5:53 am
